विसापूर फाट्याजवळ घडला बर्निंग दुचाकीचा थरार
क्षणात दुचाकीचा कोळसा
विसापूर : येथील एक युवक काही कामानिमित्त आपल्या दुचाकीने विसापूर फाट्यावर जात असताना अचानक दुचाकीने पेट घेतल्याची थरारक घटना गुरुवारी सकाळी ११ वाजताच्या सुमारास घडली. यात दुचाकी पूर्णपणे जळून तिचा कोळसा झाला. या विचित्र घटनेमुळे वाहनचालक चांगलेच धास्तावल्याचे दिसून आले.
. प्राप्त माहिती नुसार विसापूर येथील लोकेश ठेंगणे (२३) या युवकाने काही दिवसापूर्वी बजाज पल्सर कंपनीची सेकंड हॅन्ड दुचाकी खरेदी केली. लोकेश त्या दुचाकी बजाज पल्सर एम.एच.बी.के.८७०१ ने काही कामा निमित्त विसापूर फाट्यावर जात असताना अचानक फॉरेस्ट नर्सरी जवळ धावत्या गाडीने पेट घेतला. पाहता पाहता आगीने रौद्ररूप धारण केले. त्यामुळे लोकेश गोंधळून गेला व त्याने दुचाकी तशीच टाकून सहाय्यता मागण्यासाठी शेजारीच असलेल्या टोल नाक्यावर धाव घेतली. टोल नाक्यावरील कर्मचार्यांनी क्षणाचाही विलंब न करता अग्निशमन यंत्राने आग विझविण्याचा प्रयत्न केला परंतु खूप वेळ झाल्याने दुचाकी ९० टक्के जळून खाक झाली होती. आग विजविण्यासाठी जवळपास दोन सिलेंडर लागले. भर रस्त्यावर दुचाकी जळल्याचा थरार नागरिकांनी अनुभवला.
. त्यामुळे वाहन चालक चांगलेच धास्तावले. घटनास्थळावर प्रत्यक्षदर्शीनी सांगितल्या नुसार दुचाकीच्या स्टार्टर जवळील वायर स्पार्किंग मुळे धुवा दिसत होता व त्यामुळे गाडीने पेट घेतला असावा असा अंदाज वर्तविला जात आहे. या घटनेची माहिती बल्लारपूर पोलिसांना मिळताच त्यांनी घटनास्थळी भेट देऊन दुचाकीचा पंचनामा केला.
