वरोरा-चिमूर महामार्गावरील घटना
भीषण धडकेत दुचाकीस्वार जागीच ठार
साथीदाराची प्रकृती चिंताजनक
वरोरा : वरोरा-चिमूर महामार्गावरील शेगाव गावाजवळ मंगळवारी दुपारी एक भीषण अपघात घडला. वेगाने येणाऱ्या विना क्रमांकाच्या ट्रॅक्टरने दुचाकीला समोरासमोर जोरदार धडक दिली. या भीषण अपघातात ३४ वर्षीय तरुणाचा दुर्दैवी मृत्यू झाला असून, त्याचा साथीदार गंभीर जखमी झाला आहे. या घटनेमुळे महामार्गावर काही काळ तणावाचे वातावरण निर्माण झाले होते.
नेमकी घटना काय ?
मिळालेल्या माहितीनुसार, स्वामी मलया यमलू (३४) आणि संतोष राजू पवार (१८), दोन्ही राहणार भद्रावती, हे आपल्या दुचाकीने (क्र. MH 34 BS 1887) वरोरा-चिमूर मार्गावरून जात होते. दुपारी १ वाजताच्या सुमारास शेगाव जवळील एका धोकादायक वळणावर समोरून येणाऱ्या विना क्रमांकाच्या महिंद्रा ट्रॅक्टरने त्यांच्या दुचाकीला जोरदार धडक दिली. हा ट्रॅक्टर महालगाव येथील स्वप्नील बदकी यांच्या मालकीचा असल्याचे सांगण्यात येत आहे.
रक्ताच्या थारोळ्यात पडले तरुण
ही धडक इतकी भीषण होती की, दुचाकीवरील दोन्ही तरुण रस्त्यावर फेकले गेले. अपघातात गंभीर दुखापत झाल्याने दोघेही रक्ताच्या थारोळ्यात पडले होते. परिसरातील नागरिकांनी प्रसंगावधान राखून तातडीने घटनास्थळी धाव घेतली आणि जखमींना वरोरा येथील उपजिल्हा रुग्णालयात दाखल केले. मात्र, दुर्दैवाने डॉक्टरांनी तपासणीअंती स्वामी मलया यमलू यांना मृत घोषित केले.
दुसऱ्या तरुणाची प्रकृती चिंताजनक
या अपघातात संतोष पवार हा तरुण गंभीर जखमी झाला असून त्याची प्रकृती चिंताजनक आहे. वरोरा येथे प्राथमिक उपचार केल्यानंतर त्याला पुढील उपचारासाठी तातडीने चंद्रपूर येथील जिल्हा रुग्णालयात हलवण्यात आले आहे.
विना क्रमांकाची वाहने आणि धोकादायक वळणे
चिमूर-वरोरा मार्गावरील वळणे सध्या वाहनधारकांसाठी मृत्यूचा सापळा बनत आहेत. त्यातच विना क्रमांकाची वाहने आणि चालकांचा अतिवेग यामुळे निष्पाप नागरिकांचे बळी जात असल्याचा संताप स्थानिक नागरिकांनी व्यक्त केला आहे. घटनेची माहिती मिळताच पोलिसांनी घटनास्थळी धाव घेत पंचनामा केला असून, ट्रॅक्टर चालकाविरोधात गुन्हा दाखल करण्याची प्रक्रिया सुरू आहे. या घटनेमुळे भद्रावती शहरासह परिसरात शोककळा पसरली आहे.
