भाविकांची संभाव्य गर्दी लक्षात घेता नियोजित कामे वेळेत पूर्ण करण्याचे प्रशासनाला निर्देश
चंद्रपूर : येथील आराध्य दैवत माता महाकालीच्या वार्षिक यात्रेच्या पार्श्वभूमीवर, भाविकांना सोयीसुविधा पुरवण्यासाठी महानगरपालिका प्रशासन सज्ज झाले आहे. यात्रेच्या पूर्वतयारीचा आढावा घेण्यासाठी रविवारी, २२ मार्च रोजी उपमहापौर प्रशांत दानव यांनी प्रत्यक्ष पाहणी केली. सध्या भाविकांची गर्दी कमी असली, तरी आगामी काळात वाढणारा ओघ लक्षात घेऊन सर्व कामे वेळेत व नियोजनबद्ध पद्धतीने पूर्ण करण्याचे निर्देश त्यांनी यावेळी दिले.
. या पाहणी दौऱ्यात मनपा आयुक्त अकुनुरी नरेश, संबंधित प्रभागातील नगरसेवक, तसेच महानगरपालिकेचे विविध विभागांचे अधिकारी व कर्मचारी मोठ्या संख्येने उपस्थित होते.
स्वच्छता आणि पाणीपुरवठ्यावर विशेष भर
यात्रेदरम्यान शहरात येणाऱ्या भाविकांच्या आरोग्यासाठी स्वच्छता व्यवस्था अधिक सक्षम करण्याच्या सूचना उपमहापौरांनी दिल्या. यासाठी अतिरिक्त सफाई कर्मचाऱ्यांची नियुक्ती करणे, कचऱ्याचे नियमित संकलन व त्याची शास्त्रोक्त विल्हेवाट लावण्याचे नियोजन करण्यात आले आहे. तसेच, भाविकांसाठी ठिकठिकाणी पिण्याच्या पाण्याची उपलब्धता आणि परिसरात अखंड प्रकाश व्यवस्था (Path-lights) राहील याची दक्षता घेण्याचे आदेश संबंधित विभागांना देण्यात आले.
वाहतूक आणि सुरक्षिततेचे नियोजन
यात्रेच्या काळात शहरातील वाहतूक विस्कळीत होऊ नये, यासाठी मुख्य व अंतर्गत मार्गांची दुरुस्ती आणि तात्पुरत्या पार्किंग व्यवस्थेची आखणी करण्याबाबत चर्चा करण्यात आली. आपत्कालीन परिस्थिती हाताळण्यासाठी वैद्यकीय पथके आणि २४ तास नियंत्रण कक्ष (Control Room) कार्यान्वित ठेवण्याच्या सूचनाही प्रशासनाला देण्यात आल्या.
समन्वयाने काम करण्याचे आवाहन
“भाविकांना यात्रेदरम्यान कोणतीही अडचण येऊ नये, हे आमचे मुख्य उद्दिष्ट आहे. त्यासाठी सर्व विभागांनी आपापसांत समन्वय राखून जबाबदारीने काम करावे,” असे आवाहन प्रशांत दानव यांनी केले. नागरिकांची सुरक्षा आणि सुविधांना सर्वोच्च प्राधान्य देऊन प्रशासन ही यात्रा यशस्वी करण्यासाठी प्रयत्नशील असल्याचे यावेळी सांगण्यात आले.
