Ø पंप चालकांसाठी जिल्हाधिका-यांनी निर्गमित केले आदेश
Ø साठेबाजी व काळाबाजार रोखण्यासाठी प्रशासन ॲक्शन मोडवर
Ø अफवांवर विश्वास न ठेवण्याचे नागरिकांना आवाहन, नियम मोडणाऱ्या पंपांवर होणार कडक कारवाई!
चंद्रपूर : चंद्रपूर जिल्ह्यात एचपीसीएल (HPCL), आयओसीएल (IOCL), बीपीसीएल (BPCL), न्यायरा (Nayara) आणि जिओ (Jio) या कंपन्यांचा पेट्रोल व डिझेलचा पुरेसा साठा उपलब्ध आहे. तसेच जिल्ह्यात इंधनाचा नियमित व सुरळीत पुरवठा सुरू आहे. परंतु, गेल्या काही दिवसांपासून समाज माध्यमांवर (Social Media) पसरणाऱ्या विविध अफवांमुळे नागरिकांमध्ये भीतीचे वातावरण निर्माण झाले आहे. परिणामी, पेट्रोल पंपांवर इंधन भरण्यासाठी नागरिकांची अनावश्यक गर्दी होत असल्याचे प्रशासनाच्या निदर्शनास आले आहे.
. सध्या जिल्ह्यात खरीप हंगाम सुरू असून शेतकऱ्यांना शेतीच्या कामांसाठी डिझेलची अत्यंत तातडीची आवश्यकता भासत आहे. या परिस्थितीचा फटका शेतकऱ्यांना बसू नये आणि शेतीची कामे रखडू नयेत, यासाठी जिल्हाधिकारी वसुमना पंत यांनी मोठा निर्णय घेतला आहे. जिल्ह्यातील पेट्रोल पंपचालकांनी शेतकऱ्यांची योग्य ओळख पटवून त्यांना दररोज जास्तीत जास्त ३० लिटर डिझेलचा पुरवठा करावा, असे स्पष्ट निर्देश जिल्हाधिकाऱ्यांनी दिले आहेत. याबाबत त्यांनी बुधवारी (दि. २७) अधिकृत आदेश निर्गमित केले असून हे आदेश तात्काळ प्रभावाने ३० जून २०२६ पर्यंत संपूर्ण जिल्ह्यात लागू राहतील.
📄 जिल्हाधिकारी स्वतः ‘ॲक्शन मोड’वर; पेट्रोल पंपांवर अचानक धडक
दोन दिवसांपूर्वीच जिल्हाधिकारी वसुमना पंत यांनी चंद्रपूर शहरातील विविध पेट्रोल पंपांवर अचानक धडक देऊन पाहणी केली होती. यावेळी त्यांनी पंपांवरील साठा रजिस्टरची (Stock Register) प्रत्यक्ष तपासणी केली, तसेच पंपावर उपस्थित ग्राहकांशी थेट संवाद साधून त्यांच्या अडचणी जाणून घेतल्या. या गंभीर परिस्थितीनंतर जिल्हा प्रशासन पूर्णपणे ॲक्शन मोडवर आले असून, सर्व संबंधित शासकीय यंत्रणांना चोवीस तास अलर्ट राहण्याचे निर्देश देण्यात आले आहेत. जिल्ह्यात पेट्रोल आणि डिझेलची कोणत्याही प्रकारची साठेबाजी किंवा काळाबाजार होणार नाही, तसेच अतिरिक्त दराने इंधनाची विक्री केली जाणार नाही, याची दक्षता घेण्याचे आदेश प्रशासनाने दिले आहेत.
🪪 डिझेल खरेदीसाठी शेतकऱ्यांना ‘या’ ५ गोष्टी दाखवणे बंधनकारक
शेतकऱ्यांच्या नावावर डिझेलची साठेबाजी किंवा गैरवापर रोखण्यासाठी जिल्हा प्रशासनाने कडक नियमावली तयार केली आहे. त्यानुसार शेतकऱ्यांना दर दिवशी जास्तीत जास्त ३० लिटर डिझेल मिळवण्यासाठी शेतकऱ्याचे अधिकृत ओळखपत्र, जमिनीचा चालू सातबारा उतारा (7/12), फार्मर आयडी, चालू मोबाईल क्रमांक, शेतीसाठी वापरल्या जाणाऱ्या वाहनाचे किंवा ट्रॅक्टरचे आर.सी. बुक हे कागदपत्रे तपासून देणे बंधनकारक राहील.
🚑 रुग्णवाहिका व अत्यावश्यक सेवांना प्राधान्याने इंधन पुरवठा
सर्वसामान्य नागरिक आणि शेतकऱ्यांसोबतच आरोग्य यंत्रणेला कोणताही फटका बसू नये, याची काळजी प्रशासनाने घेतली आहे. जिल्ह्यातील सर्व रुग्णवाहिका (Ambulances) आणि इतर सर्व प्रकारच्या अत्यावश्यक सेवांशी संबंधित असलेल्या वाहनांना पेट्रोल पंपांवर कोणताही अडथळा न येता प्राधान्याने (Priority) इंधन पुरवठा करण्यात यावा, असे निर्देशात म्हटले आहे.
📹 पंपांवर ‘CCTV’ आणि ‘शिल्लक साठ्याचा फलक’ लावणे अनिवार्य
जिल्ह्यातील प्रत्येक पेट्रोल पंपचालकाला आपल्या पंपावर उपलब्ध असलेला शिल्लक साठा (Closing Stock), त्या दिवशी कंपनीकडून प्राप्त झालेला एकूण साठा आणि पुढील विक्रीसाठी मागणी केलेला साठा, याची इत्यंभूत माहिती पंपाच्या दर्शनी भागात मोठ्या फलकावर प्रदर्शित करणे बंधनकारक करण्यात आले आहे.
. यासोबतच, “नागरिकांनी गरजेपेक्षा जास्त इंधन भरून साठा करू नये. तसेच कोणत्याही अफवांवर विश्वास ठेवू नये,” असा स्पष्ट संदेश असणारा फलकसुद्धा पंपाच्या दर्शनी भागात लावणे आवश्यक आहे. पेट्रोल पंप परिसरात सी.सी.टी.व्ही. (CCTV) यंत्रणा पूर्णपणे कार्यरत असावी. तपासणी पथक आल्यास त्यांना सीसीटीव्ही फुटेज उपलब्ध करून देणे बंधनकारक राहील. तसेच शेतकऱ्यांना विक्री करण्यात येणाऱ्या डिझेलची रोजची नोंद स्वतंत्र रजिस्टरमध्ये ठेवून ते तपासणी पथकास सादर करावे लागेल.
👮 तहसीलदारांचे विशेष तपासणी पथक आणि पोलिसांची गस्त
या आदेशाच्या अंमलबजावणीसाठी जिल्ह्यातील सर्व तहसीलदारांना विशेष पथके स्थापन करण्याचे आदेश देण्यात आले आहेत. हे पथक आपापल्या तालुक्यातील पेट्रोल पंपांची नियमित अचानक तपासणी करेल आणि प्रत्येक आठवड्याला आपला अहवाल जिल्हा प्रशासनाकडे सादर करेल. पेट्रोल पंपांवर होणारी गर्दी नियंत्रित करण्यासाठी आणि संभाव्य कायदा व सुव्यवस्थेचे प्रश्न किंवा वाद टाळण्यासाठी स्थानिक पोलीस प्रशासनाला पेट्रोल पंप परिसरात नियमित गस्त (Patrolling) ठेवण्याचे आदेश दिले आहेत. या आदेशाचे काटेकोरपणे पालन करण्याची संपूर्ण जबाबदारी संबंधित पेट्रोल पंप चालक, मालक आणि व्यवस्थापक यांची राहील.
📞 शेतकऱ्यांसाठी हेल्पलाईन क्रमांक आणि कडक कारवाईचा इशारा
जिल्हा प्रशासनाने स्पष्ट केले आहे की, या आदेशाचे उल्लंघन करणाऱ्या किंवा नियमांचे पालन न करणाऱ्या पेट्रोल पंपांवर जीवनावश्यक वस्तू कायदा १९५५ (Essential Commodities Act) आणि पेट्रोलियम नियम २००२ नुसार कडक फौजदारी कारवाई करण्यात येईल.
शेतकऱ्यांना शेतीकामासाठी डिझेल मिळण्यात काही अडचण येत असल्यास किंवा इंधन पुरवठ्याबाबत कोणत्याही प्रकारच्या तक्रारी असल्यास त्यांनी जिल्हा प्रशासनाच्या 07172 – 252272 या नियंत्रण कक्ष हेल्पलाईन क्रमांकावर तात्काळ संपर्क साधावा, असे आवाहन प्रशासनातर्फे करण्यात आले आहे.
