ग्रामीण क्रीडा प्रतिभेला मिळणार प्रोत्साहन
चंद्रपूर : ग्रामीण भागातील सुप्त गुणांना वाव देऊन क्रीडा आणि शिक्षणाला नवी दिशा देण्याच्या उद्देशाने नंदोरी (बु) येथे स्थानिक शालेय विद्यार्थ्यांनी स्थापन केलेल्या ‘छत्रपती शिवाजी कबड्डी मंडळाला’ अत्याधुनिक कबड्डी किट (टी-शर्ट) वितरित करण्यात आले. तसेच, नंदोरी-मांगली जिल्हा परिषद क्षेत्रातील सामाजिक कार्यकर्ते अंबर जीवतोडे यांच्या मार्गदर्शक दिनदर्शिकेचे (कॅलेंडर) भव्य अनावरण करण्यात आले.
अंबर जीवतोडे यांच्या सामाजिक कार्याचा गौरव : याप्रसंगी अंबर जीवतोडे यांच्या दिनदर्शिकेचे अनावरण करण्यात आले. या दिनदर्शिकेत केवळ तारखाच नव्हे, तर महत्त्वाचे सामाजिक संदेश, प्रेरणादायी विचार आणि शासकीय सुट्ट्यांची माहिती देण्यात आली आहे. अंबर जीवतोडे हे या भागात ग्रामीण विकास आणि युवकांच्या सक्षमीकरणासाठी सातत्याने कार्य करत आहेत.
विद्यार्थ्यांमध्ये उत्साहाचे वातावरण : नंदोरी (बु) हे गाव कबड्डीसारख्या पारंपरिक खेळांसाठी ओळखले जाते. येथील विद्यार्थ्यांनी स्वतः पुढाकार घेऊन तयार केलेल्या संघाला प्रोत्साहन देण्यासाठी विशेष टी-शर्ट आणि किट देण्यात आले. नवीन गणवेश मिळाल्यानंतर खेळाडूंनी मैदानावर एक छोटेखानी प्रदर्शन सामना खेळून आपल्या कौशल्याची चुणूक दाखवली, ज्याला ग्रामस्थांनी टाळ्यांच्या कडकडाटात दाद दिली.
. या सोहळ्याला छत्रपती शिवाजी कबड्डी मंडळाचे सर्व खेळाडू, अरुण जोगी, महेंद्र जीवतोडे, चेतन तिखट, सूर्यभान घाटे, सुनील शेंडे, सुभाष डाहुले यांच्यासह मोठ्या संख्येने ग्रामस्थ उपस्थित होते.
