वारकरी संप्रदायाच्या जयघोषात ‘गारच्या दुर्गा देवी’चे शाही आगमन
राजस्थानहून मागवली भव्य मूर्ती
गुढीपाडव्याच्या शुभमुहूर्तावर रंगला सोहळा
वारकऱ्यांनी दिला ‘व्यसनमुक्ती’चा संदेश
करण ठाकरे
चंद्रपूर : अध्यात्म, परंपरा आणि सामाजिक बांधिलकीचा त्रिवेणी संगम गुरुवारी भद्रावती तालुक्यातील नंदोरी येथे पाहायला मिळाला. गेल्या २५ वर्षांपासून ग्रामस्थांचे श्रद्धास्थान असलेल्या ‘गारच्या दुर्गा देवी’च्या नवीन मूर्तीचे १९ मार्च २०२६ रोजी गुढीपाडव्याच्या शुभमुहूर्तावर अत्यंत थाटात आणि भक्तीमय वातावरणात आगमन झाले. वारकरी संप्रदायाचा जयघोष, मृदंगाचा गजर आणि फुगड्यांच्या खेळाने संपूर्ण नंदोरी गाव भक्तीच्या रंगात न्हाऊन निघाले होते.
अडीच दशकांचा ऋणानुबंध आणि भावूक निरोप
सन २००१ मध्ये नागपूर जिल्ह्यातील तुमसर येथून आणलेली सिमेंटची मूर्ती अडीच दशकांपासून नंदोरीकरांच्या जीवनाचा अविभाज्य भाग होती. मात्र, काळाच्या ओघात मूर्तीला भेगा पडल्याने (मूर्ती खंडित झाल्याने) शास्त्रोक्त पद्धतीने विसर्जन करण्याचा निर्णय ‘बाल दुर्गा उत्सव मंडळा’ने घेतला होता. २७ जानेवारी २०२६ रोजी पाटाळा येथील वर्धा नदीच्या पात्रात अत्यंत भावूक वातावरणात जुन्या मूर्तीला निरोप देण्यात आला. २५ वर्षांचा ऋणानुबंध असल्याने विसर्जनाच्या वेळी उपस्थित महिला आणि भाविकांचे अश्रू अनावर झाले होते.
राजस्थानची कलाकुसर आणि भव्य मिरवणूक
जुन्या मूर्तीच्या विसर्जनानंतर, मंडळाने राजस्थान राज्यातून विशेष ऑर्डर देऊन देवीची भव्य आणि आकर्षक मूर्ती घडवून आणली. गुरुवारी या मूर्तीचा आगमन सोहळा ‘छत्रपती शिवाजी महाराज चौक’ येथून मोठ्या दिमाखात निघाला. मिरवणूक मार्गस्थ होत असताना ग्रामपंचायत जवळील लहान हनुमान मंदिराजवळ भाविकांसाठी ‘मसाला भाताचा’ प्रसाद ठेवण्यात आला होता, ज्याचा आस्वाद भजनकर्त्यांनी व ग्रामस्थांनी घेतला. पुढे आखर चौक येथे वारकरी संप्रदायातील भजन, हरिपाठ आणि मृदंगाच्या गजराने संपूर्ण गावकऱ्यांचे लक्ष वेधून घेतले.
वारकरी संप्रदायाचा ‘व्यसनमुक्ती’चा संदेश
मिरवणूक आखर चौकात पोहोचली तेव्हा महिला आणि पुरुषांनी फेर धरत फुगड्या खेळल्या. केवळ धार्मिक विधीच नव्हे, तर यावेळी वारकरी मंडळाने समाजाला मोलाचा संदेश दिला. “आम्ही आज वारकरी आहोत, भजन-हरिपाठ करतो म्हणूनच आम्हाला समाजात मान-सन्मान मिळतो. जर आम्ही व्यसनाच्या आहारी गेलो असतो, तर कोणीही आम्हाला विचारले नसते. त्यामुळे तरुणांनी वाईट व्यसनांपासून दूर राहावे,” असे आवाहन वारकरी बांधवांनी केले. त्यांच्या या सामाजिक भूमिकेचे सर्वत्र कौतुक होत आहे.
प्राणप्रतिष्ठा आणि महाप्रसाद
मिरवणूक झेंडा चौक येथील मंदिरात पोहोचल्यानंतर, शुक्रवार २० मार्च २०२६ रोजी देवीची विधिवत ‘प्राणप्रतिष्ठा’ (घटस्थापना) करण्यात आली. या मंगलप्रसंगाचे औचित्य साधून शनिवार २१ मार्च रोजी संपूर्ण नंदोरी गावकऱ्यांसाठी भव्य ‘महाप्रसादा’चे आयोजन करण्यात आले होते. हजारो भाविकांनी या महाप्रसादाचा लाभ घेतला.
. या संपूर्ण सोहळ्याच्या यशस्वीतेसाठी बाल दुर्गा उत्सव मंडळाचे सर्व पदाधिकारी, कार्यकर्ते आणि समस्त नंदोरी ग्रामस्थांनी परिश्रम घेतले. या सोहळ्याने नंदोरी गावातील आध्यात्मिक वातावरण अधिकच वृद्धिंगत झाले आहे.
