किशोर डुकरे यांची प्रहार शेतकरी संघटनेच्या जिल्हाध्यक्षपदी नियुक्ती
आक्रमक आणि संघर्षाची पक्षाकडून दखल
वरोरा : तालुक्यातील आसाळा येथील धडाडीचे शेतकरी नेते आणि सामाजिक कार्यकर्ते किशोर डुकरे यांची प्रहार जनशक्ती पक्षाच्या शेतकरी संघटनेच्या जिल्हाध्यक्षपदी नियुक्ती करण्यात आली आहे. प्रहारचे संस्थापक अध्यक्ष बच्चू कडू यांच्या आदेशानुसार आणि कार्याध्यक्ष महेंद्र जवंजाळ यांनी ही घोषणा केली. आता त्यांच्या खांद्यावर चंद्रपूर, वरोरा, चिमूर, भद्रावती, नागभीड आणि ब्रह्मपुरी या तालुक्यांची महत्त्वाची जबाबदारी असेल.
संघर्षाचा वारसा आणि २४ गुन्हे
किशोर डुकरे यांनी यापूर्वी तालुकाध्यक्ष म्हणून काम करताना प्रशासनाला सळो की पळो करून सोडले होते. शेतकऱ्यांच्या मागण्यांसाठी तहसीलच्या झाडावर चढून केलेली ‘विरूगिरी’ आणि केंद्रीय पेट्रोलियम मंत्र्यांना दाखवलेले काळे झेंडे यांमुळे ते चर्चेत आले होते. शेतकरी हितासाठी लढताना त्यांच्यावर आतापर्यंत २४ गुन्हे दाखल झाले आहेत, मात्र तरीही त्यांचा जनसामान्यांसाठीचा संघर्ष थांबलेला नाही.
सामाजिक बांधिलकीची जोपासना
केवळ आंदोलनेच नव्हे, तर माणुसकीच्या नात्याने त्यांनी अनेक मनोरुग्णांची सेवा केली. रस्त्यावरील मनोरुग्णांना स्वतः आंघोळ घालून, शुश्रूषा करून स्वखर्चाने दवाखान्यात भरती करण्याच्या त्यांच्या निस्वार्थ कार्याचे सर्वत्र कौतुक होत आहे. त्यांच्या याच संघटनात्मक कौशल्याची आणि कार्याची दखल घेत पक्षश्रेष्ठींनी त्यांना ही पदोन्नती दिली आहे.
मान्यवरांची उपस्थिती आणि जिल्ह्याभरात जल्लोष
या नियुक्ती प्रसंगी प्रहार जनशक्ती पक्षाचे कार्याध्यक्ष बल्लू जवंजाळ, अभियान प्रमुख महेश बडे, दिव्यांग क्रांतीचे प्रदेशाध्यक्ष धर्मेंद्र सातव, उपाध्यक्ष शिवाजी गाढे आणि संपर्क प्रमुख प्रवीण हेंडवे प्रामुख्याने उपस्थित होते. किशोर डुकरे यांच्या निवडीचे वृत्त समजताच संपूर्ण चंद्रपूर जिल्ह्यातून, विशेषतः शेतकरी वर्गातून मोठे समाधान व्यक्त केले जात असून त्यांच्यावर अभिनंदनाचा वर्षाव होत आहे.
. “यावेळी पक्षाचे वरिष्ठ पदाधिकारी बल्लू जवंजाळ, महेश बडे, धर्मेंद्र सातव, शिवाजी गाढे आणि प्रवीण हेंडवे यांच्या उपस्थितीत हा नियुक्ती सोहळा पार पडला. किशोर डुकरे यांच्या रूपाने एक आक्रमक आणि अभ्यासू नेतृत्व जिल्ह्याला मिळाल्याने शेतकरी बांधवांमध्ये आनंदाचे वातावरण आहे.”
