चंद्रपूर दीक्षाभूमीच्या विकासासाठी ५७ कोटी मंजूर
पालकमंत्री डॉ. अशोक उईके यांच्या हस्ते प्रभातफेरीला हिरवी झेंडी
चंद्रपूर : भारतरत्न डॉ. बाबासाहेब आंबेडकर यांच्या १३५ व्या जयंतीनिमित्त चंद्रपूर शहरात उत्साहात अभिवादन करण्यात आले. राज्याचे आदिवासी विकास मंत्री तथा जिल्ह्याचे पालकमंत्री डॉ. अशोक उईके यांनी शहरातील डॉ. बाबासाहेब आंबेडकरांच्या पुतळ्याला पुष्पहार अर्पण करून अभिवादन केले. याप्रसंगी सामाजिक न्याय विभागाच्या वतीने आयोजित प्रभातफेरीला त्यांनी हिरवी झेंडी दाखवून रवाना केले.
डॉ. आंबेडकरांच्या आरक्षणामुळेच मी येथे : डॉ. अशोक उईके
यावेळी बोलताना पालकमंत्री डॉ. उईके म्हणाले की, “आजचा दिवस डॉ. आंबेडकरांचा संघर्ष आणि त्यांच्या कार्याचे स्मरण करण्याचा आहे. भारतीय संविधानामुळे सर्व नागरिकांना समान हक्क आणि न्याय मिळाला आहे. त्यांनी दिलेल्या आरक्षणामुळेच आज मी या पदावर उभा आहे.” आरक्षण वर्गीकरणाच्या विषयावर शासन सकारात्मक निर्णय घेईल, असेही त्यांनी यावेळी स्पष्ट केले.
कृतीतून अभिवादन करा : सुधीर मुनगंटीवार
आमदार सुधीर मुनगंटीवार यांनी आपल्या भाषणात विचारांवर भर दिला. “जयंती केवळ एका दिवसापुरती मर्यादित न ठेवता, ३६५ दिवस योग्य कृती करणे हेच बाबासाहेबांना खरे अभिवादन ठरेल. लंडन येथील त्यांच्या वास्तूला स्मारक बनवण्याचे सौभाग्य मला मिळाले, हा माझ्यासाठी मोठा सन्मान आहे,” असे ते म्हणाले. चंद्रपूर जिल्हा बाबासाहेबांच्या विचारांवर चालणारा आदर्श जिल्हा असावा, अशी अपेक्षा त्यांनी व्यक्त केली.
दीक्षाभूमीसाठी १०० कोटींचा संकल्प : किशोर जोरगेवार
आमदार किशोर जोरगेवार यांनी मानवतेचा संकल्प करण्याचे आवाहन केले. ते म्हणाले की, संविधानाने १४० कोटी जनतेला एकसंघ ठेवले आहे. चंद्रपूर येथील दीक्षाभूमीच्या विकासासाठी १०० कोटींचा प्रस्ताव पाठवण्यात आला असून, त्यापैकी ५७ कोटी मंजूर झाले आहेत. उर्वरित निधी तातडीने मिळावा, अशी मागणी त्यांनी यावेळी केली.
मान्यवरांची उपस्थिती
या कार्यक्रमाला माजी मंत्री हंसराज अहीर, आमदार सुधीर मुनगंटीवार, आमदार किशोर जोरगेवार, महापौर संगिता खांडेकर, जिल्हाधिकारी वसुमना पंत, मुख्य कार्यकारी अधिकारी पुलकित सिंह, पोलीस अधीक्षक मुम्मका सुदर्शन, मनपा आयुक्त अकुनुरी नरेश, उपविभागीय अधिकारी विशालकुमार मेश्राम, सहायक आयुक्त समाजकल्याण विनोद मोहतुरे यांच्यासह अनेक मान्यवर आणि नागरिक मोठ्या संख्येने उपस्थित होते.
