मुलींनीच मारली बाजी
संध्या घरत शाळेतून पहिली
कापीमुक्त वातावरणात यशाची परंपरा कायम
भद्रावती : तालुक्यातील चंदनखेडा येथील शासकीय माध्यमिक आश्रमशाळेने यंदाही आपल्या यशाची परंपरा दिमाखात कायम राखली आहे. नुकत्याच जाहीर झालेल्या इयत्ता दहावीच्या निकालात या शाळेचा निकाल ९०.३८ टक्के लागला असून, विशेष म्हणजे मुलांच्या तुलनेत मुलींनीच या निकालात मोठी बाजी मारली आहे. दुर्गम भागातील विद्यार्थ्यांनी मिळवलेल्या या यशामुळे तालुक्यात सर्वत्र कौतुक होत आहे.
गुणवत्तेची मोहोर : प्रथम तिन्ही क्रमांकावर मुली
शाळेतून प्रथम येण्याचा मान संध्या राजेंद्र घरत हिने मिळवला आहे. तिने ८१ टक्के गुण मिळवून शाळेच्या शिरपेचात मानाचा तुरा रोवला. द्वितीय क्रमांकावर पूजा प्रकाश श्रीरामे (८०.८० टक्के) तर तृतीय क्रमांकावर दामिनी विनोद घरत (७८.६० टक्के) ही विद्यार्थिनी राहिली. पहिल्या तिन्ही क्रमांकांवर मुलींनीच आपले नाव कोरल्याने “मुलगी शिकली, प्रगती झाली” या उक्तीचा प्रत्यय येथे आला आहे.
कापीमुक्त वातावरणात दैदीप्यमान यश
शासनाच्या कापीमुक्त अभियानाला प्रतिसाद देत अत्यंत पारदर्शक आणि कडक वातावरणात ही परीक्षा पार पडली होती. अशाही परिस्थितीत विद्यार्थ्यांनी मेहनतीच्या जोरावर हे यश खेचून आणले आहे. यावर्षी परीक्षेला एकूण ५२ विद्यार्थी बसले होते, त्यापैकी ४७ विद्यार्थी यशस्वीरित्या उत्तीर्ण झाले आहेत. विशेष प्राविण्यात ०७ विद्यार्थी, प्रथम श्रेणीत २२ विद्यार्थी, द्वितीय श्रेणीत १६ विद्यार्थी, तृतीय श्रेणीत ०२ विद्यार्थ्यांनी यश मिळविले आहे.
सातत्यपूर्ण प्रगतीचा आलेख
चंदनखेडा आश्रमशाळेने गेल्या काही वर्षांपासून यशाचा उच्चांक गाठला आहे. मागील दोन वर्षात या शाळेचा निकाल अनुक्रमे ९५ टक्के आणि ९७ टक्के असा लागला होता. यावर्षी ९०.३८ टक्के निकाल लागून शाळेने आपला दर्जा टिकवून ठेवला आहे. आश्रमशाळेसारख्या ठिकाणी सोयीसुविधांचा अभाव असूनही शिक्षक आणि विद्यार्थ्यांनी घेतलेले कष्ट या निकालातून दिसून येत आहेत.
यशस्वी विद्यार्थ्यांचे सर्वत्र कौतुक
विद्यार्थ्यांच्या या यशाबद्दल शाळेचे मुख्याध्यापक जी. बी. सोनोने, माध्यमिक शिक्षक डी. बी. सोनुले, एस. एफ. भोयर, एस. जी. सहारे, बी. डी. चांदेवार, महेश गिरडकर, किनाके, डेंगळे यांनी आनंद व्यक्त केला आहे. तसेच शाळेच्या अधीक्षिका गाडगे, अधीक्षक पोटदुखे, जय गोपाल, मडावी, सायंकार, लांडगे आणि शाळेतील सर्व चतुर्थ श्रेणी कर्मचाऱ्यांनी विद्यार्थ्यांचे पुष्पगुच्छ देऊन अभिनंदन केले. दुर्गम भागातील विद्यार्थ्यांनी प्रतिकूल परिस्थितीत मिळवलेल्या या यशामुळे पालकांमध्येही आनंदाचे वातावरण आहे.
