आ. मुनगंटीवार यांच्या प्रयत्नांतून होत असलेल्या पंडित दीनदयाल उपाध्याय कॅन्सर रुग्णालयाला मुख्यमंत्र्यांच्या शुभेच्छा

मुख्यमंत्री फडणवीस यांनी पत्राद्वारे केले आ. मुनगंटीवार यांचे अभिनंदन

दुर्गम भागातील रुग्णांसाठी आशेचा किरण ठरणार असल्याचा मुख्यमंत्र्यांना विश्वास

२८० कोटींचा अत्याधुनिक कॅन्सर रुग्णालय प्रकल्प लवकर येणार लोकांच्या सेवेत

चंद्रपूर : राज्याचे माजी वने, सांस्कृतिक कार्य व मत्स्यव्यवसाय मंत्री आमदार सुधीर मुनगंटीवार यांच्या प्रयत्नांतून साकारत असलेल्या पंडित दिनदयाल उपाध्याय कॅन्सर रुग्णालयाला राज्याचे मुख्यमंत्री ना. देवेंद्र फडणवीस यांनी पत्राद्वारे शुभेच्छा दिल्या आहेत. चंद्रपूर जिल्ह्याच्या आरोग्य क्षेत्रात ऐतिहासिक ठरणारे २८० कोटी रुपयांचे अत्याधुनिक कॅन्सर रुग्णालय दुर्गम भागातील रुग्णांसाठी आशेचा किरण ठरणार असल्याचे नमूद करत मुख्यमंत्री महोदयांनी आ.  मुनगंटीवार यांचे अभिनंदन केले आहे.

.      नुकतीच आमदार सुधीर मुनगंटीवार यांनी मुख्यमंत्र्यांची प्रत्यक्ष भेट घेऊन या रुग्णालयाला पंडित दीनदयाल उपाध्याय यांचे नाव देण्याची आग्रही मागणी केली होती. या मागणीला मुख्यमंत्री देवेंद्रजी फडणवीस यांनी सकारात्मक प्रतिसाद देत तत्काळ संमती दर्शवली व त्यानंतर मंजुरी प्रदान केली. त्यानंतर या रुग्णालयाचे अधिकृत नामकरण ‘पंडित दीनदयाल उपाध्याय कॅन्सर रुग्णालय’ असे करण्यात आले.

.        मुख्यमंत्री देवेंद्र फडणवीस यांनी हे रुग्णालय आरोग्यसेवेच्या बाबतीत अत्यंत महत्त्वाची भूमिका पार पाडणार आहे, असा विश्वास व्यक्त केला. ‘चंद्रपूर येथे पंडित दीनदयाल उपाध्याय कर्करोग रुग्णालय साकारले जात आहे, याचा मला आनंद आहे. मानवसेवा, आधुनिक वैद्यकशास्त्र आणि सामाजिक उत्तरदायित्व यांचा प्रभावी संगम असलेले हे रुग्णालय कर्करुग्णांसाठी महत्त्वपूर्ण ठरेल. अद्ययावत आरोग्यसेवा केवळ महानगरांपुरती मर्यादित न राहता ती दुर्गम भागांपर्यंत पोहोचली पाहिजे, या राज्य शासनाच्या भूमिकेला रुग्णालय पूरक आहे. या रुग्णालयामुळे पूर्व विदर्भातील कर्करुग्णांना आरोग्य सेवा उपलब्ध होणार आहे. राज्य शासन, जिल्हा खनिज विकास प्रतिष्ठान आणि टाटा ट्रस्ट यांच्या संयुक्त विद्यमाने आणि भाजपाचे ज्येष्ठ नेते तथा आमदार सुधीरभाऊ मुनगंटीवार यांच्या प्रयत्नांतून उभे राहत असलेले हे रुग्णालय हजारो रुग्णांसाठी आशेचा किरण ठरेल, अशी खात्री वाटते. यानिमित्ताने मुनगंटीवार यांचे तसेच रुग्णालय उभारणीत योगदान देणाऱ्या सर्व अधिकारी, कर्मचारी आणि सहकारी घटकांचे हार्दिक अभिनंदन. या सुसज्ज रुग्णालयाच्या माध्यमातून येथील डॉक्टर्स, वैद्यकीय अधिकारी-कर्मचारी रुग्णसेवेचा आदर्श घालून देतील, अशी आशा आहे,’ असे पत्र मुख्यमंत्री महोदयांनी आ. मुनगंटीवार यांना पाठवले आहे.

.      चंद्रपूर जिल्ह्याच्या आरोग्य सुविधांना नवे परिमाण देणारा २८० कोटींचा १४० खाटांचा कॅन्सर रुग्णालय प्रकल्प लवकरच जनसेवेसाठी उपलब्ध होणार आहे. टाटा ट्रस्ट यांच्या विशेष सहकार्यातून उभारलेले हे अत्याधुनिक रुग्णालय पूर्वविदर्भातील आदिवासी, ग्रामीण आणि सर्वसामान्य लोकांसाठी जीवदानाचा नवा आशादायी केंद्रबिंदू ठरणार आहे.

.     आ. सुधीर मुनगंटीवार यांच्या दूरदृष्टी, सातत्यपूर्ण प्रयत्न आणि विकासाभिमुख कार्यपद्धतीतून साकारलेला हा सर्वात मोठा आरोग्य प्रकल्प पूर्वविदर्भासाठी ‘नवजीवनाचा आशादायी प्रकाश’ देणारा ठरणार आहे.