२ कोटींच्या सौंदर्यीकरण कामाचे आ. करण देवतळे यांच्या हस्ते भूमिपूजन
मंदिर परिसरात सुशोभीकरण, सी.सी. रोड आणि कमान गेट उभारणार
भाविकांना मिळणार दर्जेदार सुविधा
भद्रावती : भद्रावती शहरातील प्रमुख श्रद्धास्थान असलेल्या प्राचीन भवानी माता मंदिर परिसराच्या सौंदर्यीकरण कामाचा भूमिपूजन सोहळा १८ मे २०२६ रोजी आमदार करण देवतळे यांच्या हस्ते मोठ्या उत्साहात पार पडला. या भव्य विकासकामासाठी सुमारे २ कोटी रुपयांचा निधी मंजूर करण्यात आला असून, यामुळे मंदिर परिसराचे सौंदर्य अधिक खुलणार आहे.
ऐतिहासिक वारशाचे जतन आणि आधुनिक सुविधा
भूमिपूजन प्रसंगी बोलताना आमदार करण देवतळे म्हणाले, “भद्रावती शहराला मोठा धार्मिक, सांस्कृतिक आणि ऐतिहासिक वारसा लाभला आहे. हा वारसा जतन करणे आणि भाविकांना स्वच्छ, सुंदर व सुविधांयुक्त वातावरण देणे हे आमचे उद्दिष्ट आहे.” या प्रकल्पांतर्गत मंदिर परिसराचे सुशोभीकरण, सी.सी. रोड आणि आकर्षक कमान गेट (प्रवेशद्वार) यांसारखी महत्त्वाची विकासकामे केली जाणार आहेत. या कामांमुळे स्थानिक नागरिक आणि भाविकांमध्ये आनंदाचे वातावरण आहे.
मान्यवरांची उपस्थिती
या सोहळ्याला भवानी माता मंदिर समितीचे अध्यक्ष ईश्वर गौरकार, माजी नगराध्यक्ष अनिल धानोरकर व संजय वासेकर, माजी नगरसेवक सुधाकर कुलथे, अमित गुंडावार, नगरसेविका वृषाली पांढरे, प्रशांत डाखरे, विशाल ठेंगणे, गोपाल गोसवाडे, इम्रान खान, किशोर गोवारदिपे यांच्यासह भारतीय जनता पार्टीचे स्थानिक पदाधिकारी, मंदिर समितीचे सदस्य आणि मोठ्या संख्येने भाविक उपस्थित होते. कार्यक्रमादरम्यान भवानी मातेच्या जयघोषाने संपूर्ण परिसर दुमदुमून गेला होता.
