‘नाते आपुलकीचे’कडून दिव्यांग विद्यार्थिनीला शिवण यंत्र भेट
गडचिरोलीच्या तेजस्वी कोळमेथेच्या स्वावलंबनासाठी संस्थेचा पुढाकार
आनंदवनमधील प्रशिक्षणाचे झाले चीज
चंद्रपूर : समाजातील होतकरू विद्यार्थी आणि गरजू रुग्णांना आधार देणारी संस्था म्हणून ओळख असलेल्या चंद्रपूरच्या ‘नाते आपुलकीचे’ या सेवाभावी संस्थेने आपली सामाजिक बांधिलकी पुन्हा एकदा जपली आहे. अत्यंत गरीब परिस्थितीत शिक्षण घेणाऱ्या एका दिव्यांग विद्यार्थिनीच्या स्वावलंबनाच्या प्रवासाला मोलाचा हातभार लावत, संस्थेने तिला शिवण यंत्र भेट दिले आहे.
कर्तृत्व आणि जिद्दीचा प्रवास
मूळची वाघधरा (पोस्ट मुरखडा, ता. चामोर्शी, जि. गडचिरोली) येथील रहिवासी असलेली कु. तेजस्वी संतोष कोळमेथे (वय १९) ही आदिम समाजातील विद्यार्थिनी आहे. तेजस्वी ८ वी उत्तीर्ण असून ती १०० टक्के कर्णबधिर दिव्यांग आहे. तिचे वडील मिस्त्री काम करून कुटुंबाचा उदरनिर्वाह चालवतात. घरची परिस्थिती अत्यंत प्रतिकूल असूनही तेजस्वीने हार मानली नाही. तिने आपल्या जिद्द आणि मेहनतीच्या जोरावर आनंदवन येथील ‘संधी निकेतन दिव्यांग कौशल्य व उद्योजकता विकास केंद्रात’ प्रवेश घेतला आणि तेथे ड्रेस शिवणकामाचा कोर्स यशस्वीरीत्या पूर्ण केला. सन २०२५–२६ च्या बॅचमधील ती एक अत्यंत हुशार आणि गुणवंत विद्यार्थिनी म्हणून ओळखली जाते.
स्वावलंबनासाठी मदतीचा हात
तेजस्वीच्या कष्टाची आणि स्वावलंबी होण्याच्या ध्यासाची दखल ‘नाते आपुलकीचे’ संस्थेने घेतली. तिला स्वतःच्या पायावर उभे राहता यावे आणि उदरनिर्वाहाचे साधन निर्माण व्हावे, या उद्देशाने संस्थेच्या वतीने तिला शिवण यंत्र भेट देण्यात आले. हे यंत्र स्वीकारताना तेजस्वीच्या चेहऱ्यावर उमटलेले हास्य पाहून उपस्थितांनी समाधान व्यक्त केले. भविष्यात ती या माध्यमातून स्वतःचा व्यवसाय थाटून सन्मानाने जगू शकेल, असा विश्वास यावेळी मान्यवरांनी व्यक्त केला.
मान्यवरांची उपस्थिती
या स्तुत्य उपक्रमाप्रसंगी संस्थेचे अध्यक्ष संतोष ताजने, उपाध्यक्ष किशन नागरकर, सचिव प्रा. प्रमोद उरकुडे आणि सदस्य सचिन बावणे सर प्रामुख्याने उपस्थित होते. तसेच, आनंदवन येथील शिवणकाम विभागाचे मास्टर ट्रेनर महेश भगत सर आणि गिरीश मसराम सर यांनीही या कार्यक्रमाला उपस्थित राहून तेजस्वीचे कौतुक केले.
सात वर्षांचा अविरत सेवायज्ञ
‘नाते आपुलकीचे’ ही संस्था मागील सात वर्षांपासून समाजातील गरजू, आर्थिकदृष्ट्या दुर्बल विद्यार्थी आणि गरीब रुग्णांच्या मदतीसाठी कार्यरत आहे. आतापर्यंत अनेक विद्यार्थ्यांना शैक्षणिक साहित्याची मदत आणि गंभीर आजारी असलेल्या रुग्णांना भरीव आर्थिक सहाय्य या संस्थेमार्फत देण्यात आले आहे. संस्थेच्या सदस्यांच्या दातृत्वातून आणि आर्थिक मदतीतून समाजसेवेचा हा रथ अविरतपणे सुरू आहे.
