भद्रावतीच्या ज्योती देऊरकर हिने जिंकले सुवर्णपदक
देशाच्या शिरपेचात मानाचा तुरा !
गुजरातमध्ये पार पडलेल्या आंतरराष्ट्रीय स्पर्धेत मिळवले अव्वल स्थान
प्रतिकूल परिस्थितीवर मात करत महाराष्ट्राच्या कन्येची ऐतिहासिक कामगिरी
भद्रावती : गुजरात येथे नुकत्याच पार पडलेल्या आंतरराष्ट्रीय ‘वर्ल्ड योगासन चॅम्पियनशिप’मध्ये भारताचे प्रतिनिधित्व करणाऱ्या भद्रावती येथील ज्योती देवराव देऊरकर हिने सुवर्णपदकाला (Gold Medal) गवसणी घातली आहे. जागतिक पातळीवरील या अत्यंत प्रतिष्ठेच्या स्पर्धेत सुवर्णपदक जिंकून ज्योतीने केवळ महाराष्ट्राचेच नव्हे, तर संपूर्ण देशाचे नाव क्रीडा जगतात उंचावले आहे.
. या दोन दिवसीय स्पर्धेत जगभरातील अनेक देशांतील उत्कृष्ट योगासनपटूंनी सहभाग घेतला होता. त्यांच्यात झालेल्या चुरशीच्या लढतीत ज्योतीने आपल्या उत्कृष्ट लवचिकता, समतोल आणि कठीण आसनांच्या अचूक सादरीकरणाच्या जोरावर परीक्षकांची मने जिंकली आणि अव्वल स्थान पटकावले. या स्पर्धेत ओमानने रौप्य (सिल्व्हर) तर जपानने कांस्य (ब्राँझ) पदक पटकावले.
. ज्योती देऊरकर हिचा सुवर्णपदकापर्यंतचा प्रवास सोपा नव्हता. अत्यंत प्रतिकूल परिस्थितीवर मात करत, योग्य मार्गदर्शन आणि नियमित सरावाच्या बळावर तिने हे यश संपादन केले आहे. ज्योतीच्या या ऐतिहासिक कामगिरीबद्दल क्रीडा क्षेत्रातून तसेच राजकीय आणि सामाजिक स्तरातून तिच्यावर कौतुकाचा वर्षाव होत आहे. भारताने योगासनाच्या जागतिक व्यासपीठावर पुन्हा एकदा आपले वर्चस्व सिद्ध केल्यामुळे क्रीडाप्रेमींमध्ये उत्साहाचे वातावरण आहे. ज्योतीचे हे यश ग्रामीण आणि शहरी भागातील इतर तरुण खेळाडूंना योगासन क्षेत्राकडे एक उत्तम करिअर म्हणून पाहण्यास नक्कीच प्रवृत्त करेल.
