येरगाव येथील ग्रामस्थांनी पत्रकार परिषदेतून केली मागणी
सिंदेवाही
. पंचायत समिती सिंदेवाही अंतर्गत येत असलेल्या येरगाव येथील जिल्हा परिषद प्राथमिक शाळेतील मुख्याध्यापक मागील दोन महिन्यापूर्वी बदलून गेले. मात्र शाळेतील मुख्याध्यापक पदाचा पूर्णपणे प्रभार कार्यरत शिक्षिका कडे न दिल्याने विद्यार्थ्यांसह पालकांची कुचंबणा होत असून याबाबतची तक्रार करूनही याकडे गट शिक्षणाधिकारी यांनी पाठ फिरविली असल्याने शाळेला नवीन मुख्याध्यापक द्या..नाहीतर कार्यरत शिक्षिका यांचेकडे मुख्याध्यापकांचा प्रभार द्या अशी मागणी ग्रामस्थांनी पत्रकार परिषदेतून केली आहे.
. येरगाव येतील जिल्हा परिषद शाळेत १ ते ४ वर्ग असून दोन शिक्षकी शाळा आहे. मुख्याध्यापक म्हणून सागर शंभरकर, तर सहाय्यक शिक्षिका म्हणून संगीता कुंभारे कार्यरत असताना या दोन्ही शिक्षकांमध्ये अंतर्गत वाद सुरू झाल्याने मुख्याध्यापक सागर शंभरकर यांची गट शिक्षणाधिकारी यांनी इतरत्र बदली केली. त्यांना शाळेमधून सोडण्यात आले. तेव्हा त्यांचा मुख्याध्यापकांचा प्रभार देण्यात आला नाही. तत्कालीन मुख्याध्यापक यांनी कोणतेही रेकॉर्ड, कपाटाच्या कील्या आणि युजर आय डी इत्यादी कोणतेही ऐवज दिले नसल्याने विद्यार्थ्यांची कामे, ग्रामस्थांची दाखले देणे थांबलेले आहेत. त्यामुळे गावकऱ्यांनी नवीन मुख्याध्यापक देण्याची पंचायत समिती कडे मागणी केली. मात्र ती मागणी अजूनही धूळखात पडली असून तत्कालीन मुख्याध्यापक हे आपला प्रभार देण्यास नकार देत असताना सुद्धा गट शिक्षणाधिकारी किशोर पिसे हे सागर शंभरकर यांना पाठीशी घालत असल्याचा आरोप गावकऱ्यांनी केला आहे.
. यापूर्वी गट शिक्षणाधिकारी यांना गावकऱ्यांनी भेटून मुख्याध्यापक देण्याची किंवा कार्यरत शिक्षिकेकडे प्रभार देण्याची मागणी लावून धरली. मात्र गट शिक्षणाधिकारी हे या मागणीकडे जाणीवपूर्वक दुर्लक्ष करीत असल्याचा आरोप गावकऱ्यांनी केला तसेच गट विकास अधिकारी यांना सुद्धा भेटण्याचा अनेकदा प्रयत्न केला. मात्र त्यांचेसोबत भेट होऊ शकली नाही. त्यामुळे अखेर मुख्याध्यापक द्या. नाहीतर कार्यरत शिक्षीकेकडे प्रभार द्या. अशी पत्रकार परिषदेतून मागणी केली आहे. या पत्रकार परिषदेला येरगाव येथील शाळा व्यवस्थापन समितीचे नवनिर्वाचित अध्यक्ष राजू सुरपाम, प्रवीण तोरे, खुशाल धूर्वे, पुंडलिक सहारे, रवि सुरपाम, विनोद ठाकरे, विलास सुरपाम, उपस्थित होते.
माझ्याकडे मुख्याध्यापकांचा पूर्णपणे प्रभार देण्यात आलेला नाही. केवळ शिक्षकांची हजेरी आणि विद्यार्थ्यांची हजेरी बुक देण्यात आले. तसेच शाळेतील कपाटाच्या किल्या तत्कालीन मुख्याध्यापक यांनी स्वतःकडे ठेऊन घेतल्या असल्याने शाळेची कामे थांबलेली आहेत. मी गट शिक्षणाधिकारी तथा केंद्र प्रमुख यांना वारंवार सांगूनही दोन दिवसानंतर बघू असे म्हणून याकडे कानाडोळा करण्यात आला. संगीता कुंभारे, प्रभारी मुख्यध्यापिका, जि. प.शाळा येरगाव
येरगाव जी. प.शाळेतील तत्कालीन मुख्यध्यापक यांनी पूर्णपणे प्रभार दिला नाही. तसेच त्यांनी त्वरित प्रभार द्यावा अशा मागणीचे कोणतेही पत्र आमच्याकडे प्राप्त झाले नाही. मात्र तत्कालीन मुख्याध्यापक यांनी त्वरित पूर्णतः प्रभार देऊन सर्व रेकॉर्ड कपाटाच्या किल्ल्या द्यावा याबाबतचे दोन पत्र मी तत्कालीन मुख्याध्यापक यांना दिलेले आहेत. तसेच आज पुन्हा केंद्र प्रमुखांना पाठवून प्रभार देण्यास सांगतो. किशोर पिसे, प्रभारी गट शिक्षणाधिकारी, पंचायत समिती सिंदेवाही
