गणपती बाप्पा मोरया.. पुढच्या वर्षी लवकर या….!

भावपूर्ण वातावरणात लाडक्या बाप्पाला निरोप

पोलिसांचा चोख बंदोबस्त

चंद्रपूर : गणपती बाप्पा मोरया पुढच्या वर्षी लवकर या… च्या जयघोषात विसर्जन मार्ग दुमदुमून गेला. चंद्रपूर शहरात दहा दिवसांच्या बाप्पांना निरोप देण्यात आला. शहरात 300 सार्वजनिक गणेश मंडळांचा विसर्जन सोहळा दुपारी ३ वाजल्यापासून सुरू झाला. विसर्जन मिरवणुकीत भव्य दिव्य देखावे पाहण्यास मिळाले. भाविकांनी हे देखावे व गणेश मुर्ती पाहण्यासाठी अलोट गर्दी केली होती.

.       चंद्रपूर शहर महानगरपालिकेने कृत्रिम तलावांची व्यवस्था करून पर्यावरण रक्षणाचा संदेश दिला. गेल्या १० दिवसांपासून मोठ्या भक्ती भावाने सुरू असलेल्या सार्वजनिक गणेशोत्सवासह घरोघरी बसलेल्या गणरायाला अनंत चतुर्दशीच्या दिवशी निरोप देण्यात आला. विसर्जनाच्या दिवसापर्यंत एकूण हजारोंच्या संख्येत गणेशमूर्तीचे विसर्जन करण्यात आले. चंद्रपूर शहर महानगरपालिकेने मंगळवारी सकाळ होण्यापूर्वीच शहरातील मुख्य रस्त्यांची सफाई केली. विसर्जनाच्या दिवशी चंद्रपूरकरांनी मोठ्या संख्येने बाहेर पडत लाडक्या बाप्पाला उत्साहाने निरोप दिला.

.       याप्रसंगी गणेश विसर्जनाच्या मुख्य स्थळांकडे जाणारे रस्ते गदीर्ने फुलून गेले होते. अनेक ठिकाणी कृत्रिम तलावांची व्यवस्था करून चंद्रपूर शहर महानगरपालिकेने पर्यावरण रक्षणाचा संदेश दिला. जटपूरा गेटवरून बाप्पांवर पुष्पवृष्टी करून सर्व गणेश मंडळांच्या विसर्जन मिरवणुकींचे स्वागत करण्यात येत होते. शहरात ठिकठिकाणी लाडक्या गणरायाला थाटात डिजे, ढोल ताशांच्या मिरवणुकीत वाजत-गाजत ‘गणपती बाप्पा, मोरया, पुढच्या वर्षी लवकर या’ अशा गजरात मोठ्या भक्तीभावाने निरोप देण्यात आला. विसर्जना दरम्यान विविध सार्वजनिक गणेश मंडळांनी अयोध्या येथील राम मंदिर, विठ्ठल मंदिरचा देखावा, पारंपारिक खेळ, बलात्कारला फाशी, मोबाईलमुळे परिणाम, रेन वॉटर हार्वेस्टींग, पर्यावरण रक्षण, वृक्ष लागवड, स्त्री भ्रूण हत्या प्रतिबंध, प्रदूषण नियंत्रण याबाबत आकर्षक देखाव्याद्वारे जनजागृती केली. गणेश विसर्जन रात्री उशिरा ४ वाजेपर्यंत झाले. स्वच्छतेकरिता महानगरपालिका सफाई कर्मचारी सकाळी ८ ते दुसऱ्या दिवशी पहाटे ६ वाजेपर्यंत
निरंतर कार्यरत होते.