- गडचांदूर नगरपरिषदेला अतिक्रमणाचा विसर ?
गडचांदूर : औधोगिक नगरी गडचांदूर शहरातील अतिक्रमणाने रस्ते गिळंकृत केले असतानाही नगरपरिषद प्रशासनाच्या दुर्लक्षित धोरणाने, जागोजागी वाहतूक कोंडी होऊन वाहनधारकांना, सामान्य नागरिकांना कमालीचा त्रास सहन करावा लागत असतानाही शहरात वाढलेले अतिक्रमण काढण्यासाठी गडचांदूर नगरपरिषदने अतिक्रमण धारकांना दिलेला नोटीस कालावधी संपूनही कुठलीही कार्यवाही न झाल्याने गडचांदूर नगरपरिषदला अतिक्रमणाचा विसर पडला असल्याचे चित्र दिसून येत आहे.
. नगरपरिषदच्या स्थापनेमुळे शहराच्या विकासाची गती वाढेल, शहराच्या सौंदर्यात भर पडेल. शहराच्या प्राथमिक समस्यातरी निकालात लागेल अशी सामान्य जनतेची अपेक्षा होती. मात्र नगरपरिषद स्थापन होऊन आठ वर्षाचा कालावधी लोटत असताना सुद्धा शहरातील प्राथमिक समस्याची पूर्तीही नगरपरिषद करू शकली नाही. नगरपरिषदच्या स्थापनेनंतर नगरपरिषदने शहरातील अतिक्रमण काढून रस्ते मोकळे करणे आवश्यक होते मात्र गडचांदूर नगरपरिषदने प्रमुख समस्यला बगल देत बाजूला ठेवले आहे.
. गडचांदूर शहरातील वाढत्या लोकसंखेच्या प्रमाणात अरुंद रस्त्यावर दोन्ही बाजूने दुकानदाराणी केलेल्या अतिक्रमणाने, रस्त्यावर जागोजागी कोंडी निर्माण होत आहे. येथील बसस्थानक परिसर, गांधी चौक, शिवाजी चौक, बाजार रस्ता याठिकाणी असणाऱ्या दुकानदारांनी रस्त्यावरच सामान ठेवल्याने पार्किंग साठी जागा ही शिल्लक नसल्याने रस्ता अरुंद होऊन वाहनांची कोंडी निर्माण होते. तर पायी चालणाऱ्या नागरिकांनाही कमालीचा त्रास सहन करावा लागत आहे. नगरपरिषद प्रशासनाने दुकानदारांना दोनदा अतिक्रमण काढण्यासाठी नोटीस दिली. मात्र नगरपरिषदनेच कारवाही करण्याचे टाळल्याने, काही अतिक्रमणधारकांनी पक्के अतिक्रमण करण्याचा सपाटाच लावल्याचे दिसते आहे. मात्र नगरपरिषद प्रशासन डोळे मिटून असल्याने नागरिकांना कमालीचा त्रास सहन करावा लागतो आहे.
आठवडी – गुजरी बाजारही रस्त्यावरच ! ग्रामपंचायत काळापासून रस्त्यावर भरणारा गुजरी बाजार व आठवडी बाजार आताही रस्त्यावरच भरत आहे. गडचांदूर नगरपरिषदकडे, गुजरी बाजार भरवण्याची जागा आहे. भाजी विक्रेत्यांना बसण्यासाठी लाखों रुपये खर्च करून ओटे बांधकाम करण्यात आले. मात्र परिस्थिती जैसे थे.
मुख्याधिकारी रणजित यादव यांचेकडून अपेक्षा ? गडचांदूर शहरातील अतिक्रमणाच्ची वाढती समस्या बघता केवळ महिनाभरासाठी गडचांदूर नगरपरिषदचे मुख्यअधिकारी म्हणून, नव्यानेच रुजू झालेले आयएएस अधिकारी रणजित यादव हे अतिक्रमण ग्रस्त गडचांदूर शहराची दखल घेत शहरातील अतिक्रमण हटवतील काय ? अशी अपेक्षा गडचांदूरकर करीत आहे.
