चंद्रपुरात नायलॉन मांजाची छुप्या मार्गाने विक्री

मांजा विक्रीसाठी पोलिसांचा आशीर्वाद : शहरात मोठ्या प्रमाणात मांजा

चंद्रपूर 

.         पक्षी, प्राण्यांसह मनुष्याच्या जीवाला धोकादायक ठरणाऱ्या चिनी, प्लास्टिक आणि नायलॉन माजांच्या विक्रीला राज्य सरकारने बंदी घातली आहे. मात्र तरीही अशा जीवघेण्या मांजाची छुपी विक्री, वापर आणि साठवणूक केली जात असल्याने पोलिस सतर्क झाले आहे. ही बंदी झुगारून नायलॉन मांजाचा वापर करताना कुणी आढळल्यास बंदी आदेश न पाळल्याबद्दल गुन्हा दाखल होऊन तुरुंगवासही होऊ शकतो, असा इशारा पोलिसांनी दिला आहे.

.         सक्रांत जवळ येऊ लागताच चंद्रपूरच्या आकाशात वेगवेगळ्या रंगाचे पतंग दिसू लागतात. परंतु ही पतंगबाजी करताना नायलॉन मांजाचा वापर केल्यास तो जीवघेणा ठरू शकतो. या धोकादायक मांजामुळे या कालावधीतअनेक पक्षी, प्राणी जखमी होतात, तर काही मृत्युमुखी पडतात. हे कापलेले धागे पतंगांसोबत जमिनीवरच राहतात आणि ते जैवविघटनशील नसल्यामुळे मातीमध्ये मिसळतात. गटारे अडवणे, ड्रेनेज लाइन, नद्या, नाले यांसारखे नैसर्गिक पाण्याचे मार्ग, माती यावर विपरीत परिणाम होतात. पडलेले धागे कापून पडल्यामुळे गुरेढोरे, गायी आणि इतर प्राणी नायलॉनसह अन्नपदार्थ खातात. त्यामुळे राज्य सरकारने १९८६च्या पर्यावरण संरक्षण कायद्याच्या कलम ५ नुसार या मांजाची विक्री व वापरावर बंदी घातली. तरीही या मांजाची विक्री आणि वापर सर्रास सुरू असते. अशा विक्रेत्यांवर आणि मांजा वापरणाऱ्या पतंगप्रेमींवर चंद्रपूर पोलिसांची बारीक नजर असेल.

अन्यथा गुन्हा दाखल करणार : नायलॉन किंवा चिनी मांजा वापरताना अगर विक्री करताना कुणी आढळल्यास बंदी आदेशाचे उल्लंघन केल्याप्रकरणी कलम १८८ अंतर्गत गुन्हा दाखल होईल. हा जामीनपात्र गुन्हा असला, तरी न्यायालयाच्या आदेशाप्रमाणे एक महिना कारावास किंवा दंड तसेच दोन्ही शिक्षा होऊ शकतात. या मांजामुळे कुणी जखमी झाल्यास भादंविच्या इतर कलमांनुसारही कारवाई केली जाऊ शकते, असे पोलिसांनी म्हटले आहे.

नायलॉन मांजा विक्रीसाठी पोलिसांचा आशीर्वाद : चंद्रपूर शहरालगत असलेल्या दुर्गापूर येथे एका पतंग विक्रेत्याकडे नायलान मांजा असल्याची माहिती मिळतात पोलिसांनी धाड टाकली. या धाडीत सदर पतंग विक्रेत्यांकडून नायलॉन मांजाचे दोन बंडल मांजा मिळाला. परंतु विक्रेत्यांवर गुन्हा दाखल न करण्यासाठी पोलिसांनी 30 हजारांची मागणी केली. सदर पतंग विक्रेत्यांनी पैशांची मागणी फेटाळून लावली. यानंतर त्या पतंग विक्रेत्यावर गुन्हा दाखल करण्यात आला, अशी चर्चा नागरिकांमध्ये सुरू आहे. तसेच चंद्रपूर शहरातील काही पतंग विक्रेत्यांवर चंद्रपूर शहर पोलिसांचा आशीर्वाद असल्याचेही बोलल्या जात आहे.